45 نصيحة للسفر للإمارات
بقلم: سوسن سحاب
✈✈✈✈✈✈✈1- اول حاجه تعملها قبل ما تيجي تروح تتعلم انجليزي كويس جدا ، اي وظيفة هنا محتاجة لغة قوية.
ما تقولش حمشي حالي بكلمتين وخلاص ، خد الموضوع بجدية واتعلم صح
2- لما تحجز تذكرة السفر ما تحجزش one way ، لا احجزها بالعودة وخليها مفتوحة
المهم يكون في تذكرة عودة عشان لو السبل ضاقت لا قدر الله واضطريت تنزل مصر، يبقى ما تقعدش كل همك في الدنيا انك تستلف فلوس التذكرة اللي حتروح بيها.
3- اوعى أي شركة سفريات تضحك عليك في مصر وتقولك حنجيبلك فرصة عمل ب 15 الف جنيه أو 20 ألف جنيه مثلا ؛ حتتخيل انك حتعمل عمايل وتسوي الهوايل وتبعت لأهلك وتحوش كمان!!!!
وتيجي هنا تتفاجيء أن 20 الف جنيه يعني حوالي 4 آلاف درهم تقريبا، ودول يدوبك يعيشوك عيشة بسيطة وممكن ما تعرفش تبعت حاجة لأهلك أو تحوش فلس كمان، ويمكن ماتعرفش تكمل الشهر بدون سلف،
المصيبة بقى انه كمان ما يطلعش عقد عمل من اساسه، ودي بتكون فيزة زيارة فقط ولسه حتيجي تدور على شغل.
4- الفتره الاخيره سمعنا عن مصريين كتير موجودين في الامارات منصوب عليهم وبيناموا في الشارع أو في أي مسجد
الموضوع ده اتكرر كتير جدااا
لا يكاد يمر أسبوع إلا ونسمع عنه عشان كده بنحذر وبكل قوة
5- أنواع التأشيرات ( الفيز ) للامارات نوعين مالهمش ثالث
الأول فيزا زياره ودي إما شهر واحد أو 3 شهور
الفيزا الشهر يتراوح سعرها تقريبا بين 400 او 500 درهم، حوالي ( 2000 الى 2500 جنيه مصري تقريبا.
والفيزا 3 شهور سعرها تقريبا 1200 درهم أو اكتر يعني حوالي 6 او 7 الاف جنيه مصري.
النوع التاني إقامه عمل ودي تكلفتها تقريبا من 6000 ل 8000 درهم يعني من 30 ل 40 الف جنيه والمفروض ان الشركه اللي اتعاقدت معاها هي اللي تدفع تكاليف الإقامة .
6- السكن ...
حلم انك اول ما تيجي حتعيش أحسن عيشه وشقه وعربية كلها طموحات وأماني....حتعرف معنى الشيرينج لما توصل والواقع حيكون سرير شيرينج مع مجموعة عزاب في غرفة، وسعر السرير الشيرينج في غرفة من 4 أو 5 أفراد في دبي هو نفس سعر شقة 3 غرف ع النيل في مصر
حتشوف في السكن الشيرنج حاجات كتير وبلاوي زرقاء ...اقفل على حاجتك عشان ما تتخانقش كل شوية لو لقيت حد اخد حاجتك.
السرير الشيرينح في غرفه مشتركه يبدأ سعره من 800 درهم حوالي( 4000 جنيه مصري ) شهريا وده اقل سعر سكن ممكن تلاقيه وصعب كمان أصلا انك تلاقيه، يعني حط ميزانية 1000 درهم للسكن حوالي 5000 جنيه.
7- اعمل حسابك انك تكون مغطي مصاريف سكنك هنا الفتره اللي انت جاي تقعدها هنا يعني لو فيزة شهر او 3 شهور من سكن وأكل وشرب
ولو بتدخن اعمل حسابك أن علبة السجاير بقت بعشرين درهم غير الضريبة (يعني حوالي 105 جنيه)
8- وانت داخل الامارات لازم يكون معاك ألف دولار بيسألوك عليهم في المطار ويكون معاك حجز فندق وتذكرة عودة لأن ضابط الجوازات بيسال عليهم وممكن يمنعك من السفر
9- لازم كمان يكون معاك صحيفة الحالة الجنائية (الفيش والتشبيه) مش حتدخل من غيرها.
10- نيجي بقى على أهم نقطة.....
تاخد معاك كام وانت جاي من مصر؟؟؟
ركز معايا واحسبها صح...
ارخص تذكرة طيران حوالي 5000 جنيه ويتغير السعر حسب المواسم
تأشيرة ال 3 شهور فى حدود 6000 او 7000 مصري
والسكن حسب الإمارة اللي فيها شغلك عشان توفر مواصلات ووقت ضايع في الطرق وحيكون قي حدود 1000 درهم يعني حوالي 5000 جنيه تقريبا
وبالنسبة للاكل ممكن يكلفك من 700 لألف درهم في الشهر يعني حوالي 4000 مصري بالكتير.
بالنسبة للمواصلات فيه كارت بيتشحن للباص وللمترو هيكلفك حوالي 500 درهم فى الشهر يعنى 2500 مصري
11- خلاصة المصاريف بالجنيه
5000 سكن ×3 شهور
4000 أكل × 3 شهور
2500 مواصلات×3 شهور
5000 تذكرة طيران
7000 فيزا
المجموع 46.500 جنيه تقريبا
ممكن يزيد أو ينقص حسب تدبير الشخص أو إسرافه أو حسب تغير وزيادة الأسعار في الإمارات
12- وصلت الامارات؟؟ حمد لله على السلامة وانتبه معايا الله يكرمك، الجاي ده مهم جداااا
13- لو ربنا كرم بشغل في حالة فيزا الزيارة سياحة .. مش لازم تخرج خارج الدولة... بتعمل بدل مغادرة وتدفع 2000 درهم او اقل تقريبا
14- اول حاجة تعملها بعد ما تلاقي شغل وتستقر انك تتعلم السواقة وتنسى سواقة مصر تماما وتروح تطلع رخصه (ليسن ) لأن التاكسيات غالية وممكن تستخدم المترو ، والمترو كل محطة ليها سعر مش كله سعر موحد
15- أسهل حاجة هنا الكريديت كارت (بطاقة الفيزا) حتلاقي موظفي البنوك بيتصلوا بيك عشان تعمل بطاقة وتعيش حياتك .... وتشتري كل حاجة بالفيزا وحيوهموك انك سهل تسدد ، وحتلاقي نفسك من غير ما تاخد بالك بتصرف بالعبيط، والحياة عندك سلسة جدا، وبعدين تصحى من الغفلة تلاقي نفسك متعمم عليك (يعني مطلوب للبنوك) وممنوع من السفر أو الدفع يا الحبس.
16- الحياة هنا مغرية جدا وكل شيء بالأقساط، نصيحة ما تنبهرش بالمظاهر اللي حتشوفها وتقابلها وتحاول تقلد وتاخد لك عربية أقساط وأي فون أقساط وسفر اوربا بالأقساط
وغيره وغيره وفجأة حتلاقي نفسك مديون لطوب الأرض.
17- كل يوم بنشوف حالات الديون بتاعة الكريديت ودي بالذات مش حتلاقي حد يقف جنبك فيها
كل حد حيقولك يعني انت تصرف وتستمع وانا اللي احاسب ع المشاريب؟؟
18- كل مصرية هنا هي اختك ومش اي بنت لوحدها تبقى بنت مش كويسة...هي مش متغربه رفاهية ..... هيا زيك متغربة عشان هي كمان وراها عيلة بتصرف عليها
19- كل بنت هنا نفسها تلاقي ابن الحلال وتتجوز فما تحطش في بالك انك تتسلى بكل بنت وتسيبها عشان راسمة على جواز !!! اومال عايز واحدة محترمة ترسم على ايه يا روح طنط؟؟؟
20 - الصاحب ساحب ما تخليش حد ياخدك في سكك مش مضبوطة بارات وديسكوهات وملاهي ليلية
وبلاش سكة الحرام عشان اخرتها سودة.
21- صاحب الغربة ممكن يكون زي صاحب الجيش صحوبية وقتية وكل واحد يروح لحاله وممكن يكون أخوك الذي لم تلده امك...لو لقيته أمسك فيه وحافظ عليه قوي
22- فكرتك عن شارع الرقة اللي في دبي هي نفس فكرة الخليجيين عن شارع الهرم بالضبط ... والاتنين شوارع عادية جدا وساكنين فيهم ناس محترمة ، فبلاش فكرة التعميم فيك شيء.
23- أدعي ربنا يكون ليك تأمين صحي على شغلك، ولو مفيش يبقى تحاول مع شغلك لازم يعملوا لك تأمين، ولو ما نفع يبقى دور على تأمين علشان العلاج هنا غاااااااالي نااااااااار
24- مفيش نشر هدوم في البلكونات ولا حبال غسيل
فيه مخالفة للحبال في البلكونات
ولا شوي (باربيكيو) في البلكونات
وطبعا ما ترميش أي حاجة بره الشباك او البلكونة فيها غرامة
25- فيه اشارات لعبور المشاه استخدمها بدل ما تتخالف،مخالفة عبور المشاه 200 درهم
ومترميش زبالة على الأرض والبصق على الأرض غرامته 500 درهم .
26- ممنوع التدخين في أي مكان ولو دخنت في الشارع شوف المكان المخصص للسجاير عشان ما ترميش اعقاب السجاير في الشارع
27- حزام الأمان ضروري وكاميرات الشوارع ح تصورك وتلاقي الشرطة بتتصل بيك انك اخدت مخالفة عدم ربط حزام أمان في الشارع الفلاني..... ما تتفاجئش (حصلت معايا مرة )
😅
😅28- لو عملت حادث لا قدر الله أو حد خبطك ما تعملش زي مصر وتنزل تضرب وتتخانق .... احترم نفسك واطلب الشرطة اهم شيء تقف على جنب ما توقفش حركة المرور عشان ما تاخدش مخالفة تانية وهي تعطيل حركة السير
29 - لو واجهتك مشكلة والشرطة وقفتك. ..تقف وتتكلم باحترام وترمي سيجارتك لو بتدخن واوعى تهرب أو تنفض عشان مشكلتك ما تكبرش. ..تكون محترم حتلاقي احسن معاملة
30-اي ممنوعات هنا آخرتها السجن ومفيش تهاون ولا وسايط
امشي عدل تلاقي احسن معاملة
31- اول شهور حتتعب وتلاقي نفسك مش بتحوش حاجة وكمان ممكن تتداين عااااادي جدااا كلنا مشينا نفس الطريق
32- حتلاقي نفسك انت اللي ب تتصل بأهلك وانت اللي بتسأل عليهم ده العادي ما تشيلش في نفسك ولو حصلك مشكله مش حتقدر تحكي لهم علشان ما يقلقوش عليك .
33- بعد كام شهر ح تتعود ع الغربة ويجيلك تناحة المتغربين
😅😅😅😅34- حتلاقي نفسك بتاكل كل يوم فراخ فراخ لحد ما تريش ولما تحب تنزه نفسك حتروح كنتاكي فراخ برضه
😁
😀35- لازم تعرف كام كلمة هندي يساعدوك... سيدا يعني على طول ....جالدي :بسرعة.... كرك: شاي بلبن ...براتا: فطيرة هندي ..زين : كويس ....ارباب: مدير...... ليسن : رخصة قيادة
36- الفطار اليومي الرسمي للموظفين كرك وبراتا
😅
😅37- لو كنت مغترب سابق في السعودية هتفرح قوي علشان مش هتلاقي كلمة عوايل يا محمد
😅
😅😅38- وما تعملش مقارنات بين مصاريف الامارات والسعودية..... المصاريف هناك حمادة وهنا حمادة جاله شلل
39- لو كنت متجوز اعمل حسابك اول ما ربنا ييسرها هات اسرتك معاك عشان عيالك يكبروا في حضنك وما تاخدش ع الوحدة وبعد كده تلاقي نفسك اتدبست في جوازة تانية ، وفي نفس الوقت عشان ما تتحولش لمجرد منتج وتنزل مصر تبقى ضيف تقيل منتظرين اجازتك تخلص بفارغ الصبر .
40- حاول تتعلم من الجنسيات التانية وتحط هدف لحياتك قبل ما العمر يسرقك وما تعملش زي اللي جاي دبي يقول اصرف ما في الجيب يأتيك ما في الغيب..مفيش فلوس بتيجي من الهوا
41- خلي علاقتك كويسة بكل الناس وعلى رأي المثل: خد لك من كل بلد صاحب وما تاخدش من كل بلد عدو واوعى تتريق أو تسخر من أي جنسية لأنه طبعا غير لائق وكمان عشان فيه عقوبة قانونية
42- انسى موضوع ان الدرهم ب 5 جنيه ده لانه مبينفعش انت هنا بتصرف بالدرهم مش بالجنيه يعني ما تحسبش مرتبك وكل حاجة بتشتريها بالمصري لأن حتتعب من الحساب
43- ما تفكرش ان أي حد بينصحك بعدم السفر يبقى بيكسر مجاديفك أو مش عايز يسندك. ... محدش بياخد رزق حد ، بس فعلا لأن الفرص في الإمارات قلت وبقى التواجد والحصول على فرصة عمل صعب جدا، بس برضه الأرزاق بيد الله .. تعالى وجرب حظك بس ما تنساش النصائح دي.
44- مرة تانية بلاش تعمل كريديت ، وافتكر اني قلتلك بلاااااش
45- تابع صفحة وجروب مصريون في الإمارات
https://www.facebook.com/groups/egyptianinuae/
#سوسن_سحاب
ليست هناك تعليقات:
إرسال تعليق