دولاب الذكريات

                   دولاب الـذكريـــات
 

 

بفتح دوﻻب الذكريات
نطت من جواه حاجات
لعب قديمة 

تذاكر سيما
ورق كوتشينة
كتب...قصص
ومذكرات.......

*****

صور كتير 

مناديل حرير

شرايط كاسيت
قبل زمن السيديهات
أم كلثوم فات الميعاد

محمد فوزي

نجاة وسعاد

عبد الحليم

سواح وماشي في البلاد
محرم فؤاد
يا واحشني....

رد عليا
 إزيك سلامات
وفايزة أحمد

خلينا ننسى
ننسى اللي فات

*******

شوية كتب

ومجلدات...
فوق السطور
مكتوب حكايات 
في الصفحات
ورد دبلان 

حبة جوابات
في كل كتاب....

وردة مطوية
وفي كل جواب...

قصــة منسية

******
شرايط فيديو 

غزل البنات

أستاذ حمام

نحن الزغاليل
أفلام شادية
 ماجدة ....

وفيلم المراهقات

**** 

عروستي القماش

بفستانها الباهت

وشعرها البني
تصحى كانت

وتنام في حضني

*****

مسحت التراب

 فوق الحاجات

نفضت عن عقلي 

غبار وتراكمات
لقيتني بنت صغيرة
رجع بيا الزمن لحظات

 

****** 

رجعت لأيام المدرسة

أيام جميلة ما تتنسى

كان نفسي بدون مذاكرة

أدخل كلية هندسة

 

وحلمت

حلم بتحلمه كل البنات

ييجي الفارس الأسمر

من وسط كل صحابي

يختارني أنا بالذات
 

*****
كل ما ياخدني الحنين

أفتح دولاب الذكريات
وأعيش يومين

 في زمان فات

في كل ذكرى 

حلوة...ومرة

في لحظة شهدت
ميلاد فكرة
في كل امبارح

أصبح بكرة

كل ده وكتير حاجات
رجعت لما فتحت.....
دولاب الذكريات 

 *******

سوسن سحاب