زي النهارده
زي النهــارده
ومن كااااام سنة
ربنا إداني هدية
خصني بيها أنا
أول ما عيني وقعت على حُسنها
وأحلى من 100 قمر أنا شفتها
قلت مين دي؟؟
يا خبر
دي أنا !!!!
حتة مني
وقاعدة جنبي
مغمضة لسه عيونها...
كل ما أبص لها
أستغربني وأقول...
إزاي قلبي بره جسمي
ولسه عايشة ؟؟
قلب نبضه زي نبضي
لونه...شكله..رسمه هو رسمي
إنسان صغير
مش عارفه عايزه إيه
عايزة أبوسها
عايزة أخدها جوة قلبي
وأقفل عليه
وهما بيقطعوا حبلك السري
بكيت أنا
عايزاكي طول العمر
لازقة فيا
ولازقة فيكي
عرفتي ليه دلوقت؟؟
ليه على طول أنا
ماسكة في إيديكي
وإنتي جنبي
حتى وأنا في الشارع بعديكي
بحس عايزة أدخلك
جوايا تاني
وتضحكي
وتقولي يا ماما
خفِّي إيديكي
سيبي إيدي
أنا ما بقتش صغيرة
لا يا قلبي
مهما كبرتي
ومهما جيتي
ومهما روحتي
حتفضلي في عيني صغيرة
حبيبتي أم الضفاير
اللي أخاف عليها
من نسمة هوا طاير
واللي ح أفضل طول العمــر
أسجد لربي وأشكره وأنحني
إنه رزقني
أحلى هدية في عمري
وبيها وحدي خصني
بصت لي بنتي باندهاش
مستعجـــــبة !!!!
فيه إيه يا ماما؟؟
قلت لها أنا عارفة
إنتي قد إيه مستغربة
لكن كل اللي قلته حتفهميــه
في مرحلة الصبا
لما تشوفي قلبك
قاعد بيتنطط بالفرحة جنبك
قلب حيقلب حياتك كلها
لما تضحك تفتَّح وردها
ولما تزعل تشيلي همَّها
حيخلي كل حاجة في الدنيــا
بعيدة ومتعبة
تتقلب بقدرة قادر
لفرحة قريــــبة
بس كل اللي عايزة أقوله دلوقتي
كل سنة وانتــي يا قلبي.....طيبــــة
.JPG)
25/ 6/ 2013
سوسن سحاب
ليست هناك تعليقات:
إرسال تعليق