يــــا رب حِـلَّـــهــا
عارفه
إني أقول كلمة بحبك....
أو أقول لك كلمة
من القلب اللي دايب
لكــن مــش بِيـَّـــــدِيولا قادرة أمنع نفسي إني
كل ما أفكر في بلدي
أشوف صورتك
يا أغلى الحبايب
سمارك من شمسها
طيبتك من أرضها
كل حاجة فيك....
بالضبط زيها
جدعنة ابن البلد
ويا الكرم
الشهامة
الكرامة
الكبرياء
كأني رفعت راسي.... وبصيت للهرم
في كل شيء تشبهها
حتى في وقت شدتها
لما تلقى فجأة المشاكل كلها
فوق راسك متجمعة
وتبقى لا عارف
حبيبك من عدوك
مين ضد ومين معَ ؟؟؟
ساعتها بتفرق قوي
لما تلقى حد جنبك
حد قادر يسمعك
ويفهمك....
حد قلبه مِــلك قلبك
حد نفسه يسعدك....
حد لا يمكن يكدب عليك
أو يخدعك
حد ولا يفكر يوم إنه يوجعك
وفي شدتك ياخدك في حضنه
يطبطب عليك ويدلعك
حد مهما الغربة تاخدك......
كلمة منه ترجَّعــــــك
حد بيشوف مصر فيك
يلقى الملامح بالضبط
حد نفسه يكون ليك
بدون أي قيد أو شرط
حد نفسه يقول بحبك وبحبها
بس مش قادر.....
وسط المشاكل كلها
غير إنه يدعي لمصـــر
ويقول يارب.......
من عندك حِلها
سوسن سحاب
