رباعيات في حب الــوطــــــــن....
الوطن..
مش حفنة عفنة من تراب
زي ما قال ابن العبيطة
ولا شوية نقـط وخطوط
مرســومة على الخريطة
*******
الوطن
هو المصانع والمزارع والشوارع
وبنت زي القمر صوت ضحكتها طالع..
لما تضحك...ضحكتها توقف الشارع
الوطن لما تقول الآه...تلقى حد سامع
*******
الوطن
هو الجيران لما
يهلـــوا عليك ويجروا
هو صحابك اللي اتعودت
تروح معاهم سينما مترو
*******
الوطن
هو فسحة فقايري ع الكورنيش
هو دفعتك في أصعب أيام الجيــــش
هو جرجس تاكل معاه صيامي
ويفطر معاك على خشاف وياميش
*******
الوطن
بنت الجيران حبيبتك
واقفة في الشباك
وانت موارب الشيش
وعينك ضاربة هناك
*******
الوطن
هو ايام ثانوي والجامعة
ذكرى جميلة ومقالب والعة
وجد ولعب وحب في حب
وعيون من الضحك دامعة
*******
الوطن
هو الشوارع والحارات
اللي محفور على كل شبر فيه
حواديت وحكايات
والناس بتفرح فيه رغم الاهات
*******
الوطن
بنوتة حلوة
مكسوفة وحاضنة كتاب
وأولاد بيلعبوا الكورة الشراب
وعلاء بيصفر وينادي إيهاب
*******
الوطن
هو البيوت
والحيطان وشجرة توت
يطلعها عشانِك ابن الجيران
واللي غيران...يطق يموت
*******
الوطن
بنت الجيران القمر
اللي ساكنة في تالت دور
تلوِح العيون ومعجبينها طابور
ويا بخته اللي طال منها النظر
*******
الوطن...
هو ابويا وأمي
هو صاحبي وخالتي وعمي
هو كل حد يحـبني
يخــاف عليَّ ويشيل همِّــي
*******
الوطن..
هو فلوكة ومراكبي
ومشي ع الكورنيش وحبة ترمس
وبنت وولد....ايدين تترعش
وعيون بتهمس
*******
الوطن...
هو النيل والهرم
وطيبة وســهتـنة
وأحسن جدعنة
وفوقيهم رشـة كرم
*******
الوطن...
غديوة تعملها
مع حبايبك وتروح تنام
تضرب فول وطعمية
أو كشري وحمص شـــام
*******
الوطن...
وانت عنه بعيد
بتشوفه شكل تاني
بتشوفه أحلى وأجمل
وأنقى من كل المعاني
*******
الوطــن..
بره ...غير وإنت جوه
وانت في الغربة
شايفه كل حاجة حلوة
بترجع ذكرياتك لما تسمع غنوة
*******
الوطن..
مهما بعدت طول العمر
أراهنك حتى لو قلبك حجر
مش حتمسك دمعتك لو سمعت
شادية بتغني يا حبيبتي يا مصر
*******
الوطن ..
كل دول مع بعضهم
أو كل حاجة لوحدها
بس في كل حاجة..سر فريد
مش موجود غير عندها
*******
واللي يحبها
ويعشق أرضها
ياخدها على بعضها
زي ما هي كده ويحبها
*******
سوسن سحاب
ليست هناك تعليقات:
إرسال تعليق