الأحد، 23 يونيو 2013

النهاية


النهــــاية
                                                                               
                                                                          

انتــهى الحب الكبيــر
وكتبته...
الفصل الأخير
وشهدت إنزال الستار
على قلب هزوم كسير

انتــهى ولن أعــود
مللت دربك المســدود
الآن....
عاد لي الاختيــار
لم أعد لحبــك أسير

انتهى حبي وزمنــك
وآخر شعرة بيني وبينــــك
أخذت وحدك القرار
وقطعتها بلا ضميــر

انتهى وهذه بدايتي
وسأنتظر ما سوف يأتي
وفي النهاية....
أقولها بلا غرور
أنت....
لم تكن بحبي جدير.....



بنت البلد

بنــــت البلـــد
                      
                                


 بنت بلدي وردة 

وجمالها فتح حوالينا

جمال مصري نغنيه

 ونحكيه في حكاوينا 

جدعنة ولا ألف راجل 

برة وجوه تشرفينا

طيبة قلب وحنية 

وشمعة تنور ليالينا

وأخاف من اللي شافك


ولا صلاش على نبينا


تمشي تقولي يا أرض

انهدي ما عليكي قدي

يا بنت بلدي حني علينا

ده العمر لسه خضار

ولا رحنا في الهوى ولا جينا

ولا شاف القلب جرح

ولا غنت ربابة غناوينا

ولا سهرنا نعد نجوم

ولا كتبنا ع الشجر أسامينا

امتى تحني علينا 

أو حتى في المنام تزورينا

ياااااا بنت البلد

سوسن سحاب
 

الفلاحة والصعيدي

الفلاحة والصعيدي



                                                                                   
فلاحة جميلة ماشية ورايحة البندر
. الصفاير ليل اسود والوش مزنهر
الخد تفاح احمر والجتة منه تقشعر
والعيون يابوي سوادهم جنون يسحر
والجمال يقول اميرة ومن حقها تتغندر
والخلخال على الارض بالجلع يتمخطر
وانا يا حلوة دوبت فيكي من اول منظر
والعمة عوجتها وبقيت وراكي زي غدنفر
ودقة الخلخال جننتي ويا مورك يا عنتر
والضحكة تعلى كان غيرك يا صعيدي اشطر
واجري واقول اكتبلك مكاتيب مانا قاري فالازهر
وابيعلك قراريط واشتريلك شوقة في البندر
ومن بكره البسلك شاكطة وبالكلونيا اتعطر
واجيبلك ترومبيل والونهولك ابيض واصفر
والضحكة تعلى وتقول كان غيرك اشطر
طب بصي النبي طلة وانا عالجبل اقدر
طب دقيقة اقولك هما كلمتين مش اكتر
القلب رايد قربك ومش يا حلوة عيتمنظر
والعاشق صعيدي وخافي على قلبه يتكدر
يبات قلبه حزين وعلى حزنه الجبال ما تقدر
هيا كلمة منك يبات الليل في عيونك اسهر
واقول لابوي دوبت في حلوة كانت في البندر
مليحة يابوي ولا في زيها في بنات البندر
فلاحة يابوي خدود حمرة وماشية بتتغندر
طب قولي امين وبلاش الدنيا بعندك تتعكر
ضحكت وقالت مهري غالي وعليه ما تقدر
قولت انا صعيدي وعاشق وعيونك تأشر
من ضافرك لضفايرك الدهب اصفر
وخطاويك من دارك لداري عالعشب اخضر
وابنيلك قصر في البلاد رسمه مش مكرر
بس خدي بالك عيونك للعيون مش هتظهر
وجوه قلبي اخبيكي ولا بشر يشوفك منظر
امال هو انا صعيدي وحبي صعب لو هتقدر

السبت، 22 يونيو 2013

زهرة السوسن



زهرة السوسن
                                                     


عايــزة النهارده أقولك...
كلام كبيــــر جـــــداً

لا قلتــه لحد قبــلك
وبعد ذلك أبــــدا

أنا لــو ما شفتـــك يوم
قلبــــي كتيــــر بيحــزن
                                                  
يخاصمني كل يومي 
ويفضل عليَّ معكــنن

فلو بتحـــــب قلبي
خليــه يشــوفك أحسن

فيه برضه حد يقسى

على زهرة السوسن ؟؟

22/ 6/ 2013

                                          

الجمعة، 21 يونيو 2013

عندما أكون معك



عندما أكون معك....
                                                                    
عندما أكون معك....
وأنت تقود سيارتك
ويدك تحضن يدي....

يغمرني شعورا 
بأن أترك مقعدي 
وأطير لأنام على كتفك

يملأني إحساسَ
عصفور....أعياه السفر
أو طير.... يبني عشه
على أغصان الشجر
أو قمر....نزل ليستريح 
من طول السهر
أو طفل...أبكاه الضجر

ويغمرني الشعور بأنك...
اختصرت كل البشر
وإنك جئت ليأتي معك...
بعد طول جفاف....
المطــــر
جئت لأنسى معك وبـــك
كل ما مضى من العمـــر

حبيبي....
كل الدروب تؤدي إليك...
فقل لي بربك

أيـــن المفـــر؟؟؟؟


سوسن سحاب
21/ 6/ 2013



على اسم مصر قال التاريخ كلمته

                                                             







على اســــــم مصـــر

على اسم مصر......
قال التاريخ كلمتـــه


أنا لما أقول يا مصر

يبقى الجميع يسكتوا


لمُّوا البشر وتعالوا 

أحكي وانتوا انصتوا


صلوا على نبينــــا

محمد خير أمته


عليك الصلاة والسلام

يا شفيــعنا في جنته


دي مصر أم الدنيـــا

ومذكورة في القرآن

محروسة منذ الأزل
ولآخر الأزمان


وربك ذكرها وقال

حتلقوا فيها الأمان

ادخلوا مصر
.......
إن شاء الله آمنين

ووصى بينا نبينا
وقال علينا كمان
خير أجناد الأرض
وفي رباط ليوم الدين


ويا مصري خلي بالك
كتير لكم حاسدين

أنا التاريخ وبسجل
وياما ناس حاقدين

في الوش ضحكة كبيرة
وفي القلب حقد دفين

يتحالفوا ويا الشيطان 
ويخروا ليه ساجدين

لو مصلحتهم معاه
ويقولوله آمين

عرفت يا بن مصر
 دلوقتي أنا قصدي مين؟؟

قصدي على اللي
لا ليهم ملة ولا دين
لا كانوا إخوان ولا
ولا أبدا مسلمين

ولو في يوم ذكرتهم
مش ح أقول عليهم إلا.....
أعداء ومنافقين


سوسن سحاب
21/ 6/ 2013
  




الخميس، 20 يونيو 2013

بجبك كل يوم جمعة


بحبك

                                                      

بحبك كل يوم جمعة
واحبك برده يوم السبت
خايف احكي الحيطان ليها ودان 
ليتقهروا .. يجيلهم كبت


واشوفك فجر يوم الحد
وطول اليوم تأنسيني
مفيش أحلى بجد بجد
من الفرحة اللي بتجيني
ويوم لتنين دا يوم عمري
بسيب نفسي على هواكي
واسلّم للغرام أمري
هخاف من إيه ونا معاكي
وكل تلات فـ حلم أبات
أنام واصحى على عيونك
بتسقيني الحياه شربات
ولا تحلى في كاس دونك
ويوم الاربع أعيش واشبع
بقلبي وروحي بجمالك
تغنيلي بشوق واسمع
ويحلالي اللي يحلالك
وكل خميس يا روحي عريس
وأحلى عروسة محروسة
انا فـ قلبك زعيم ورئيس
وإنتي فـ قلبي بسبوسة
تفوت جمعة ورا جمعة
ونا الميت في حبك دوبت
بحبك كل يوم جمعة
واحبك برده يوم السبت


أنا أغير؟

أنــا أغـــيـر ؟؟
                                                   

لأه....مش أنا اللي أغير
ولا أعرف يعني إيه غيرة....
أنا... 
لا يمكن أبدا أغير

مش معنى إني أموت 
لو شفت
بنات كتير حواليك
يبقى بغير؟

ولو كلمت بحسن نية
بنات حلوة
ممكن أغير؟

ولو كتبت في أي واحدة
بيتين شعر
تمدحها فيهم أو تهجوها
إزاي أغير

ولو عيونك 
لمحت صدفة
ضل أنثى
استحالة أغير

اللي صحيح يجنني
ويعيشني في متــاهة
لو لمحت في عيونك
فرحة....ماكنش جواها
أو أكون السبب فيها
لو قريت في حروفك
كلام مكتوب عشان غيري
وحسيتك دايب فيها

ساعتها
بدون تفكير
أكيد حهرب وأروح لبعيد
وأتمنى تتهنى وتبقى سعيد
مع اللي حَبها قلبك
واللي حُبها شَغَلَك
وأفضل ذكرى في قلبك
لو جيت يوم على بالك
أو مرَّ اسمي في خيالك
تفتكرلي أحلى صورة
وتقول عيبها بس
ما كنتش غيورة ؟؟

سوسن سحاب
20/ 6/ 2013

الأربعاء، 19 يونيو 2013

أعتذر للإمارات أم لمصر؟؟

أعتذر للإمارات أم لمصر؟؟



بعض الناس يمتلكون قدرات ومواهب خارقة على جعل كل من يراهم يكرههم ويحتقرهم...ومن هؤلاء الأفذاذ المدعو عصام العريان.....
ولو كان لثورة يناير أية محاسن.....فإن كل مساوئها تجمعت في العريان وجماعته الموبوءة, التي خرجت جحافلها من تحت الأرض لتملأ الدنيا قبحا وبشاعة....وتقضي على البقية الباقية من الشهامة والأخلاق المصرية....
لا أدري هل أعتذر لأصدقائي وأحبائي في الإمارات عما بدر من هذا العريان؟؟؟
أم أعتذر لنفسي وللمصريين عما سببه لنا هو وجماعته من إساءات متتالية....فهم يكيلون الشتائم والسباب للكل ليلا, ثم ينكرونها صباحا. ويسيئون للأشخاص ويفضحونهم ثم يتعاهدون معهم مقابل المليارات جهارا نهارا.....أين حمرة الخجل يا من لا تعرفون الحيــاء؟؟
ولأنهم يتفننون في صناعة فضائح للناس فإن الله يفضحهم في عقر دارهم....ونرى أوراق التوت تتساقط سريعا.
 وقال تعالى "أم حسب الذين في قلوبهم مرض أن لن يخرج الله أضغانهم" سورة محمد 29

                                                        
                                                       مصريون في الإمارات


إنذار شديد اللهجة


إنذارٌ شديدُ اللهجة
                                                                             
                           
     
                                      
كيف تراها؟؟
عقلا وروحا قلبا وفكرا...
أم سبيلا للبهجة؟؟

كيف تراها؟؟
أمّا...بنتا...خالة وعمَّة
أم .....خادمة.....لا  زوجة؟؟

يحزنني رأيك فينا يا آدم
ولا أملا فيك يـُـرجى

أشعلت نارَ غضبي
وأبدا منها لن تنجى
أصبح غضبي
بحرا هادرا موجَه

لو كان لحـــواء وجه وفاء
فلغدر آدم......
عدة أوجه

قالوا لأجل عينٍ
تُكرم ألف
وأنت أهنت 
الفؤاد والمهجــة

أسألت نفسك؟؟
في حزنك 
أو فرحك
لمن تتوجه؟؟

أما أنا........

سأصفُّ الكلمة جوار الكلمة
بلا هوادة ولا رحمة....
وأغزل من غضبي جملة مفيدة
تحمل لغرورك......
إنذارا شديد اللهجة....


19/ 6 / 2013
سوسن سحاب



الاثنين، 17 يونيو 2013

على اسم مصر يحكي التاريخ حكايات


على اسم مصر...
                                                                                                       
                                            
على اسم مصر..
يحكي التاريخ حكايات
افتح دفاتر حكمتك
وإحكي ع اللي فات....

إحكي عن شهدائها...
عشاق حبــها
من قبل أحمس...
لحد بعد السادات

دي بلد جيكا 
وجندي 
وعفت
وكتير بنات

اكتب وحسن خطك قوي..
وانت بتكتب عننا
مسلم مسيحي 
كلنا مع بعضنا
في الهم......
نصحى..... نبــات

وأرجــــوك...أرجوك
وقف قلمك...
ولو ساعات
وإقفل ودانك 
غمض عيونك
وما تكتــبش
اعتبره زمن السكات

وامحِ سيرة اللي ما يصبَّح 
ولا بالخيــر يبــات


سوسن سحاب
16/ 6 / 2013


على اسم مصر...يحكي التاريخ ويقول



على اسم مصر

على اسم مصر.......
يحكي التاريخ ويقول
يمسك ربابته ويحكي
أو حتى ع الأرغول
ع اللي حبوكي وحمُوكي
وقاوموا كل العِدا
هكسوس...فرنجة....مغول
فيهم اللي غنوا له...
عزيز يا عزيز
وفيهم اللي غنوا له
يا بلح زغــلول
فيهم اللي مات بحسرته
بعد سواد أيلول ( 1 )
وفيهم اللي جاب النصر
وبإيد ولاده....
مات مقتول
وفيهم اللي حبك 
ولا صانشي
وأهو في السجن مذلول
وفيهم شُرابة الخُرج (2 )
اللي مالهش لزوم
لا يقدر يميِّل شيء
ولا يرجعه معدول

17/ 6 / 2013
سوسن سحاب

                                      



1- أيلول الأسود هو الاسم الذي يشار به إلى أحداث شهر سبتمبر ( أيلول ) من عام 1970م  ويطلق عليه اسم أيلول الأسود. حيث تصرّفت بعض المجموعات الفلسطينية بشكل يهدد الحكم الهاشمي في الأردن، فأعلنت حالة الطوارئ وتحرك الجيش الأردني بناءاً على تعليمات الملك حسين ملك الأردن آنذاك ومستشاريه العسكريين لوضع نهاية لوجود المنظمات الفلسطينية في الأردن. وحدث ما يشبه الحرب الأهلية، وقُدرت عدد الإصابات بعشرات الآلاف, والقتلى بـ 4000 عن الطرف الفلسطيني, أما عن أعداد القتلى الأردنيين فهي بحسب سجلات الجيش الأردني أكثر من 110 جندي أردني في المعارك بينما أعداد القتلى المدنيين الأردنيين قد يصل إلى 1300 قتيل.....توفى الزعيم جمال عبد الناصر بعد عدة أيام من أحداث أيلول الأسود, لحزنه الشديد على الوضع العربي.....

2- (فلان ده شرابة خرج) ومعنى العبارة فلان عديم الفائدة ويقولون "لا بيحل ولا بيربط" .. و"الخُرج" هو كلمة فارسية من "خورة" وهو المزادة كيس الزاد ,التى توضع على الدابة ، وهو عبارة عن جراب طويل يشبه الشنطة يوضع به الزاد وله غطاء من الشراشيب يسمى شُرابة , ونظراً لأنها عبارة عن شرائح من القماش فهى عديمة الفائدة لأنها لا تغطى الكيس بإحكام, ومن هنا جائت "شرابة خرج" أى "مثل غطاء الخرج ليس له فائدة....

الأحد، 16 يونيو 2013

كلمتين





كلمتيـــــــــــــن



في نفس ذات الوقت
نفــس المكــان....
ونفس الكرسي
وذات المنضدة!!!
( حلوة المنضدة؟؟)

آجــي ألاقي الكلمتين...
مستنيني ومرصوصين
معرفش أنا..
إزاي كده !!!

يوم يكونوا مبسوطين
وأيام كتيره حزانين
على حـــالنا ده...

وســاعات بيبقوا حنينين..
وطيبين...
بيقربوا ويطبطبوا 
ويمسحوا
تعب السنين
بالهدهده

وأوقات يكونوا مونونين
متسلطنين
بيضحكوا على أي حاجة في الفراغ
كأنهم... 
استغفر الله العظيم.....
عاملين دماغ
عــالية كــده...

وأموت أنا....
لما أشوفهم ولهانين
عاشقنين ومجروحين
حب وغرام....
هجر وحنين
يووووووووووووه
طب ليه كده؟؟

وساعات في وقت م الأوقات 
تلاقي الكلمتين
متمردين
على حروفهم
على الفكرة
وعلى لون حبرهم
طب تعمل إيه
لما تكون الكلمة....
متمردة؟؟


وآآآه لما تيجي
من بعيد
وتشوفهم....
دبلانين
وتحس بيهم مجروحين
وتسمع أنيــن 
اللي كانوا موجودين
في نفس المكان 
قبل النهارده


بس اللي يعجبني قوي
لما تلقى الكلمتين
موزونين
مضبوطين 
زي فنجان قهوة 
يجيلك الصبـــح من غير طلب
زي ما ألاقيهم آخدهم 
آخدهم.....وأمشي بالآدب
وأرجع أنـــا
مبســوط كده

سوسن سحاب
16/ 6/ 2013


السبت، 15 يونيو 2013

30 /6 الجاي



30/ 6  الجـــاي                  
                                                             


وطيت نفسك لكل الناس
يا أبو الأمــراس
وعرتنا
وذليتننا
وخلتينا مدلدلين الراس

وبعد ما كنا بنغني

قوم يا مصري
وعللِّي الراس...
خليتنا بالقدم ننداس

واللي غايظني وكايدني

ذليت نفسك وذليتنا 
قدام كل الأجناس

ويجي علينا رافع راسه

نافش ريشه 
كأنه طاووس
وبطراطيف صوابعه يسلِّم
ويمد ايده عشان تنباس

- فاكرين يا بتوع اللمون؟؟

لما وقفلكوا في التحرير 
فتحلكوا صدره أكورديون
وقدامه كام مليون
من أهله وناسه والحراس؟؟

والهتيفة: يا سلام يا سلام
ما شاء الله, ده كأنه إمام
ده محروس بعناية الله
مش محتاج حد يرعاه
قول يا شيخ الله الله
مش محتاج والله حراس

- والجريمة اللي زادت؟؟
والأمان اللي انعدم؟؟؟
والأمانة اللي ماتت؟؟
كلها حاجت ملهاش مقياس؟؟؟

يا كفرة يا عِدا الإسلام
يا حقد مزروع في الإعلام
يا اللي مفيش في قلوبكوا إيمان؟؟
مش كفاية جالكوا رئيس
بيصلي وحافظ القرآن؟؟
ومربي دقنة على سُنِّة
نبينا خير الأنام
إنتوا إيه مفيش إحساس؟؟

- طب السولار والكهربا؟
أو لقمة حلوة وطيبة

آه يا جبهة اللئام
قاعدين تبصوا للسفاسف
وتسيبوا الأمور العِظام؟؟
بتدوروا ليه ع المآسي
بتدوروا على لقمتين؟؟
وناسيين إن رئيسكم إيه...
يكلف الدولة في الصلاة 
بس كام مليون جنيه؟؟
وانتوا بس بتحكوا في إيه؟؟
ده ربنا بيحبكوا وبعتلكوا
حكومة طاهرة ومتوضية
مش حكومة شوية أنجاس

- ومرصوصين دقون دقون
ولســه خارجين من السجون
آه يا قتلة وبلطجيــة
لا الدين دقن وجلابيـــة
ولا دخول الجنة بالنيــة

بدعي عليكم
فجر وصبح وظهر وعصر
ويوم الجمعة زيادة شوية
يلي قلتوا جايين ومعانا الخير لمصر
ولا شفناش غير حزن وقهر

وفي 30/ 6 الجاي

حتكوني ....
مستنية يا مصر المهر
حيجيبهولك كل شبابك
الحلوين صغار العمر
وحيفدوكي ويخلوكي 
زي القمرة في ليلة بدر
ونرجع تاني
نفرح تاني
ونرفع راسنا ونغنيلك ........
تعيشي...تعيشي
تعيشي يا مصر

سوسن سحاب
15/ 6 / 2013








                                                                                           



الجمعة، 14 يونيو 2013

بالصندوق وكمان ضمان 4 سنين



بالصندوق ....وكمان ضمان أربع سنين


الشاطر في ميعاد التنظيف جوه العنبر

حبينا يوم نشتري بوتاجاز
قلنا...نجيبه مستعمل
وننسى شوية وابور الجاز
ونبص بقى للمستقبل

شاروا علينا....
وليه المستعمل؟؟
خدوا لكم واحد بالكرتونة...
- الكرتونة؟؟؟
- أيوة الكرتونة
يعني الصندوق
وعليه كمان
تاخدوا ضمان
أربع سنين
تعيشوا فيها متهنيين
تاكلوا كباب
وتشربوا شاي من غير هباب
وابور الجاز....
- الله الله ع الإعجاز
 قال أبويا
شوفولنا حاجة بالتقسيط
أو يعني يكون تمنها بسيط
نزلنا السوق
نلف ندوَّر
شفنا كتير
ولقينا تاجــر
شكله...شاطر
وعلامة الصلاة على قورته
تقولش ختم النسر وملزوق

فضل يرغي ويقنعنا
وأغمز لأمي وأبصلها
شكله مش مريحني
نظرة عيونه بتجرحني
قالت لي عيب
 إوعي تتجنِّي
- عيب إيه؟؟
ده شكل وشه رد سجون..
يا بنتي حرام
ده الراجل كلامه موزون
وقال الله وقال الرسول

المهم قعد يقنعنا
عندي بوتاجاز
أربعة شعلة 
كهربا وغاز
لو خدتوه بيطبخ لوحده
وحتدعولي على الإنجاز
وحيوصلْكو لحد البيت
بالصندوق

بابا سأله: 
ده بالتقسيط؟؟
ضحك بسماجه:
وتمنه بسيط
وعليه ضمان أربع سنين

روحنا البيت والزغاريط
مالية الشارع
أم وفــاء جابت بوتاجاز 
بالصندوق 
وعليه ضمان أربع سنين

وفتحناه....
ويااااويلاه
باب الفرن طلع مكسور
رجعناله
بصِّلنا شذرا بكل شرور
إنتوا واخدينه بالصندوق
وعلى فكرة مش راح يرجع
- والضمان؟؟
قال لنا: يولع

رجعنا نجر ذيول الخيبة
والحزن والقهر معانا
بالضبط زي ما يكون
حد ضربنا على قفانا

وصلنا البيت معرفش إزاي
طب اعمليلنا شوية شاي

لسه بولَّع
لقيت البوتاجاز في وشي يفرقع
الحمد لله إني جريت
أبويا قال:
على جثتي لازم يرجع
وأمي قالت:
يانا يا هو في قلب البيت

رجعنا تاني للشرَّاني
بصلنا بصة 
كانت راعباني
وقفت في ضهر أبويا
وأمي كانت سانداني

قلناله صندوقك تاخده
وتسيب الحـيّ وترحل
ومانشوفش وشك هنا تاني

قال: عليَّ وعلى أعدائي
وأنا حولَّع في شارعكوا
أنا وعشيرتي وإخواني

رجعنا شارعنا نادينا الناس
نزلوا وكانوا كارهينو
وقالوا محناش خايفين منك
غشك كلنا شايفينو
تدينا الحاجة بالصندوق
والصندوق جواه ثعابينو
لمّ تعابينك وإرحل
وصندوقك محناش عايزينه
وشارعنا حينضف منكم
والســـــــــــــــــــجن....
وحشــــــــــوه مســـاجينه

سوسن سحاب
الجمعة 14/6/ 2013



الخميس، 13 يونيو 2013

أنا البنت اللي ما شافتشي أي مسلسلات تركي


مسلسلات تركي
                                                                        

أنا البنت اللي ما شافتشي
أي مسلسلات تركي
لا أعرف مين أبطالها 
ولا عن أي شيء تحكي

وسمعت كتير
عن اللي اسمه......مهند
بيقولوا إنــه:
يقول للقمر قوم
وأنا مكانك راح أقعد
بس أنا شفته راجل عادي
ومش ده الجمال اللي يعقَّد

أنا البنت اللي ماشافتشي
أي مسلسلات تركي
ولا سوري ولا مصري
ولا شفت حتى مكسيكي
ولا تصاعد الأحداث 
بشكل كتير دراماتيكي

ولا الحلمية 
ولا الهجان
ولا حتى كلام نسوان
ولا شيخ العرب همام
ولا وتمضي الأيــام

وناجي عطا الله معرفوش
وباب الحارة ولا شفتوش

وما شفتش خطوط حمراء
ولا حتى قصــة شتاء

لا شفت الجبل وديابته
ولا دياب وحبيبته


ما شفتش بس غيرك إنت
يا راجل خارج من حكايات 
ليلة بعد ألف من الليلات
يا بطل أجمل الروايات 
يا أمير أحلى الأميرات

يا أسطورة فرعونية
على توليفة مصرية
بملامح صعــيدية

يا بطلي الوحيد والأوحد
يا أحلى من أسمر ومهند
يلي في جماله مُتفرد
ويلي في حبه متمرد
يا حُب حيعيش ويخلِّد
وجوه قلبي أنا أشيلك
ولا تقدر في يوم تبعد

يا متمرد




مغرورة




مغـــــرورة

وليـــه ماكنش مغرورة؟؟                                 

وأنا شايفة البنات حواليك

هما بيطلبوا ودَّك
وأنا بس اللي جــَّّوه عنيك

تسيب الكل وتجيني 
تقولي أؤمري لبيك

وأتدلل وأدلَّع
وانت تقولي أنا أفديك

ومش عارفه بس يا عمري
إزاي أقدر في يوم أجازيك

سوسن سحاب

سؤال محيرني




سؤال بلا جواب.......  
                                               


سؤال محيرني .....
بقاله سنين

ليه كل عاشق
لازم يكون حزين؟؟

ليه دايما الحب والفرحة
مش متفقين؟؟


الأربعاء، 12 يونيو 2013

عـــــارفـه؟؟





































عــــــارفة؟؟




عارفة يا قلبي إنك من جوه هابشاني

روحت الغيط النهاردة

وكل ما أضرب في الأرض فاس عيونك مش مهملاني

لميت نفسي ولبست خلجاتي وجيتلك قوام

هو انا اقدر يا ولية أغيب عن عيونك؟؟

ولا أقدر عن عشقك أنام ...

طب قوليلي بالذمة ما اتوحشتيش عبدالسلام ؟؟

ولا خلاص نسيتي الشباب وخلص الكلام؟

ولا أقولك لما يعدي أبو جورج

هابقى أشتريلك حتت قماش

مانتي عتحبي مني الهدية 

ولا أنتي ما فاكراش 

يوم ما جبتلك حلق فضة 

وقعدتي تقولي ما عايزاشي 

وأبصر إيه وما خابراشي

النبي يا قلبي الود ودي اجيبلك

كلونيا من بتاعت فرنسا اللي عيقولو عليها في التلفزيونيات

ولا اجيبلك جزمة بحزامات

وكعبها عالي يقول طق طق

وتغير منك الحريمات

أقولك ايه العين شايفة كل حاجة

واليد ما طايلاش

بس بكره السوق

هاجيبلك حلاوة شعر بنات

وهاوصي الجزار  يحوشلي الرجلين والمعاش

وناكلو سوا أنا وانتي

ومن غيرك اللقمة ما تتهناش

ما تقولي كلمة يا ولية

ولا للحديت ما فاضياش ....

أبي يا عبدالسلام هو أنا كد الكلام المليح ده

بزياداك يا راجل قلبي وقف من حلاوة الكلام ...

 يابوووووووي......

يا مرك يا عبدالسلام 

مملكة الشعر


مملكة الشعر
                                                               

فديت الذي أعادني لمُلكي....
ووضع فوق رأسي تاجي

فالشعر كان مملكتي
والإلهام كان احتياجي

مَدينة لك....
بكل القصيدِ
وفوق السطور
وبين السطور

مَدينة لك
ببحر القوافي
وبحر هوايا
ولآليء وأمواجي

12/6/2013
سوسن