مذاكرة العيال
الأم المصرية لما تذاكر لعيالها
#حكاية_واقعية
#كتاب_حياتي_يا_عين_صفحة_مذاكرة_العيال
لما تيجي تذاكري لعيالك
أولا : لازم تحطي قدام عينك كل آيات القرآن عن الصبر الجميل....
ثانيا: لازم تخرجي ايديك بره الموضوع وما تحاوليش تستخدميها في ضرب وقرص وخلافه وافتكري ان دول قرة عينك اللي اتمنيتهم وربنا استجاب لدعائك...
ثالثا: جهزي كل شيء يصلح للأكل ...عيشي جو الرحلات والسندوتشات...
ونوعي بقى عشان تكوني جاهزة لكل الطلبات ، لأنك حتسمعي أنا جعانة، وبعد شوية عايزة آكل حاجة خفيفة، بعدها بخمس دقايق معندكيش حاجة حلوة، ووراها مباشرة عايزة سناك خفيف كده، مفيش كيس شيبس عشان الشيكولاته كانت مسكرة قوي وكده....
رابعا: كولدير ميه سقعة جنبك ولو ما عندكيش يبقى كرتونة ميه عشان كل دقيقتين عايز أشرب، وبرضه خلي شوية تلج في الفريزر عشان حتطلب معاهم كوباية مية مشبرة.....
خامسا بقى الحمام.... لأن ده الطبيعي بعد عايز آكل عايز أشرب رقم 3 إييييييه ؟؟؟؟
عايز أروح الحمام ..... ده سيستم برمجي نفسك عليه وما تزهقيش.
أساسي حتظهرلك جرعات حنان مفاجئة وسقوط زخات احضان غير متوقعة في هذا الوقت من العام..... ممكن حضن يا ماما؟ بابا حبيبي اتأخر ليه النهارده ؟ بابا جه ....ممكن أحض بابا؟؟ عديها.....
غير بقى التركيز الحاد في كل كلمة معدية أو طايرة من بعيد أو أي حوارات جانبية هم مش طرف فيه.
وطبعا ح تبدأ المساومات.....لو نجحت لك ح تجيبي لي إيه ؟؟ هو انتي حتنجحي لي ولا تنجحي لنفسك؟؟ وطبعا بتنتهي المساومة على وعد بـ أي فون 6 وتوابعه...
ونصيحة لو كان الإنجليزي بتاعك من عينة (شاط آب يور ماوس أوباما) يبقى لمي الدور وخليكي بكرامتك. ما حيصدقوا يمسكوا عليكي غلطة ...
ووقت المذاكرة ..... الذاكرة بتنشط قوي وتفتكر كل حكايات البنات، واللي حصل في المدرسة ، ونوع ولون تليفون كل بنت....
أو برضة تطلب معاهم رغي ويسألوا عن ذكرياتهم وهو بيبي أو وهي في بطنك !!!!
ولزوم الهجوم المضاد حيبدأوا يسألوكي كل الاسئلة المحرجة من عينة انتي كنتي بتطلعي الأولى ع الصف زي كل الأمهات ما بيقولوا؟؟ (وطبعا إجابتك لازم تكون ابتسامة سمجة صامتة... ما تكذبيش وتقولي آه ولا تقولي الحقيقة المرة عشان ما يتلككوش وياخدوكي قدوة ) لحد السؤال اللي بيحسس كل أم إنها من العصر الحجري...... وهو سؤال كان عندك موبايل نوعه ايه وانتي صغيرة يا ماما؟؟؟
#سوسن_سحاب
ليست هناك تعليقات:
إرسال تعليق