الاثنين، 16 مارس 2015

أنا من القاهرة 4 يا مخلف البنات



أنــا مـن القـاهـــرة
  4- يا مخلف البنات

اتغيرت حالة الضيق والزعل من يوم الجمعة لحالة عشق وانتظار على أحر من الجمر....
وذهبنا مع أبي تقريبا لكل مكان في مصر، إن شاء الله سأحكي عنهم....
وكان الاتفاق بين أمي وأبي - رحمهما الله -  أن يأخذنا هو إلى الأماكن السياحية الموجودة بكثرة في مصر وتتولى أمي مهمة التثقيف الديني وزيارة المساجد وأولياء الله الصالحين.

قبل ما أعرفكم على أحلى أماكن في مصر، سأعرفكم على أجمل ناس في حياتي.... أبي وأمي....

ولد أبي لأسرة كبيرة ومشهورة في عابدين وشارع خيرت  ( أسرة سحاب) وكان على مقربة منهم مسجد السلطان الحنفي .....فسـُمِّي أبي علي اسمه ( حنفي ) مثل معظم الأطفال في تلك المنطقة...

 والسلطان الحنفى رضى الله عنه لمن لا يعرفه.....هو شمس الدين الحنفى وهو من نسل سيدنا أبو بكر الصديق ولذا فهو من أهل البيت إذ يجتمع يجتمع نسل سيدنا أبو بكر الصديق رضى الله عنه مع الرسول صلى الله عليه وسلم فى الجد السادس لأبى بكر الصديق ( بن مرة ) وقد لقب بالسلطان لأنه لا سلطان عليه من قبل الملوك والأمراء فهم لا يأمرونه بشئ بل يقدمون له الهدايا ويتبركون به.....
وعاش شمس الدين الحنفى أثنين وسبعون عاما من 775 هـ حتى 847هـ وكان له مدرسته فى تفسير القرآن الكريم.


                                                

مسجد السلطان الحنفي

                                                              



وكان أبي في شبابه لاعب كرة قدم في النادي الأهلي، ( سنتر هاف فروورد ) وكان أكبر إخوته وطبعا لأن الكرة وقتها ما بتأكلش عيش.....أصر والده ( جدي رحمه الله) أن يعمل موظفا عشان يعرف يتجوز ويكون أسرة...

وبالفعل عمل أبي موظف في شركة بنزايون ( بعد كده أصبح اسمها شركة الأزياء الحديثة بنزايون عدس ريفولي) وترقى حتى أصبح مديرا عاما.
وكانت هذه الشركة مقصدا لأهل الفن والسياسة والمشاهير....وكم شاهدت من صور لوالدي مع السيدة أم كلثوم وغيرها من مشاهير ذاك الزمان....

كان والدي قمة في الأناقة....الكرافتة لون الشراب والحزام لون الساعة ولون الحذاء....والمنديل المكوي موضوع في جيب البدلة....
وكان يحب غسيل مناديله وشراباته بنفسه وبيديه ...وليس في الغسالة مع غسيل البيت.

ولو لخصت أبي في كلمات قليلة لقلت....القلق يمشي على رجلين.
كنا ولدين وخمس بنات وكما يقول المثل الشعبي يا مخلف البنات يا شايل الهم للممات.
كان دائم القلق خصوصا على البنات ...ولو حد مننا راح المدرسة أو الجامعة أو العمل يكون هو من الشباك للبلكونة ينتظر قدومنا....
وإذا زاد التأخير ينزل ينتظر في الشارع أمام البيت.....زاد التأخير عن حده يذهب حتى محطة الأتوبيس أو في اتجاه طريق المدرسة.....
القلق ده علمني احترام مواعيدي حتى لا أعرض أبي لمزيدٍ من القلق....

 أنا شخصيا لم أر من أبي الله يرحمه إلا الحنية حتى عندما كانت أمي تخصه بأحسن قطعة لحم أو دجاج فإنه كان لا يأكلها كلها ويعطيني جزءا كبيرا منها...بالرغم من توفر الطعام بكثرة للجميع ولكنه كان يحب أن يعطيني من طعامه.

لا أستطيع أن أنسى سندويتشات الجبنة الرومي في العيش الفينو التي كان يعدها لنا أبي للمدرسة، وطبعا كانت عندي أفضل مليون مرة من الفول أو الجبنة القريش في العيش البلدي التي كانت تعده أمي الذي كان يجعل كل الكتب مبتلة، أو سندويتشات الطعمية اللي بتبقع الكتب بالزيت.

زي ما قلت أنا ما شفتش من أبي غير الحنية، لكن اخواتي البنات الكبار شافوا الشدة وقالوا إنهم لما كانوا يعرفوا انه جاي من الشغل كانوا يختفوا....بس الحمد لله إنه في النهاية كان حنين على الجميع حتى لو كان هناك بعض الشدة فإنها مطلوبة لتربية البنات حتى تصل السفينة إلى بر الأمان........

ححكيلكم المرة الجاية عن شخصية استثنائية.....أمي

سوسن سحاب
16/3/ 2015






الخميس، 12 مارس 2015

هذا الرجل أحبه


 
              هذا الرجل......... أحبه
                                          


 






هذا الرجل أحبه....
أحبه
ببعده
بقربه
بكل جنونه
بكل هدوءه
وطيبة عيونه

بحبه
بكل شقاوته
وكل رزانته
وكل حركته
وكل سكونه

بحبـــه
وعارفه غلاوتي في قلبه
وغالي عندي
وفي قلبي أصونه


بحبه لأنه ؟
؟؟؟
بحبه وبس
من غير أسباب
ومهما أسبابي يكونوا

بحبـــــه
وهـو .......
نصي التاني
بكل تناقضه
بكل ما فيه
بكل تفصيلة
وكل تشبيه...
بعقله وجنونه

بحبـــــــه
وأحب توارد كل أفكارنا
والكلمة في نفس الوقت
يقولها لساننا
والفرحة لو تخطر في بالي
تضحكها عيونه

بحبـــــه
وأحب الطفل اللي فيه
وحنان أبويا
وأخويا
اللي لو احتجته ألاقيه
ولا عمرهم عليَّ يهونوا

بحبــــــه
بخفة دمَّــــه
وقلقه وهمَّـــه
ومشاعر كتير
يوم تبقى نار
ويوم زمهرير
من الآخر..... بحبه
بكل شجونه

بحبــــه
أحب الثائر اللي جواه
وسقف مطالبه اللي تعلى معاه
وأحبه لما يكون رومانسي
يحب حبيبه 

وعمره ما ينسى
ولا يوم يخونه

بحبـــــه
ومن كتر حنــانه

ببكي بس...
عشان يمسح دموعي
ياخدني في حضنه

وجوه عيونـــه....
 شفتوا ياناس
 قلبي وجنونه؟؟


سوسن سحاب

الثلاثاء، 10 مارس 2015

أنا من القاهرة 3 القلعة



أنــا مـن القـاهـــرة
3- القلعـــــــة 




أول مـرة بابا الله يرحمه ياخدني أنا وأخويا محمد اللي أكبر مني بسنتين ويودينا نتفسح في بلدنا....كانت القلعــة.

بالرغم إني كنت صغيرة جدا.....لكني فاكرة كل تفصيلة من تفاصيل قلعة صلاح الدين، بكل ما فيها من سور ضخم مرتفع جدا وجامع محمد علي الشامخ، ومسجد سارية الجبل أبو قبة خضراء، وهو المسجد الوحيد في مصر اللي قبته خضراء زي قبة المسجد النبوي الشريف..... 
والمتحف الحربي بكل الروائع اللي فيه من عهد أحمس لحد حرب أكتوبر المجيدة.....
وسجن القلعة بكل زنازينه المرعبة، ومتحف الجوهرة بس للأسف وقت ما رحنا كان المتحف اتعرض لحريق قبلها بوقت قليل، ولاحظت نظرة حزن في عين أبي الله يرحمه لأن المتحف كان تحفة معمارية علاوة على أنه كان يحتوي على كنوز أسرة محمد علي...

وبير يوسف بس كان مغطى بحجر، وأكشاك الموسيقى الخشبية..... حتى كل طرقات القلعة ومطالعها....كلها محفورة على جدار ذاكرة الطفولة .



ولسه بترن في وداني القصة اللي حكاها أبي عن مذبحة المماليك، لما محمد علي باشا عزم أعيان وكبراء المماليك عشان يودعوا الجيش الذاهب في حملة للقضاء على حركة الوهابين في نجد....
قفل عليهم أبواب القصر وأعطى الإشارة لجنوده بقتلهم....فقتلوهم كلهم وكانوا حوالي 500 مملوك ولكن واحد فقط اللي نجا وهو أمين بك ، لما انتبه للمؤامرة اخد حصانه ونط من فوق السور، الحصان مات وهو هرب للشام. 

سجن القلعة كان أكتر حاجة مرعبة شفتها في حياتي على الواقع في سني الصغير، وكل مرة كنت بروح فيها القلعة بعد كده كانت زنزانة ريا وسكينة هي الأكثر رعبا....

دخلنا نصلي في جامع محمد علي وأول مرة كنت أشوف أعداد كبيرة من الأجانب داخلين يصوروا المسجد بعمارته وثرياته وفخامته وهما لابسين أحذية قماش فوق أحذيتهم..كنت مبهورة جدا وفخورة جداااا ببلدي....وببتسم ابتسامة خجولة لكل الناس.

رجعت البيت وكل جسمي مكسر من مطالع ومنازل القلعة لكني كنت سعيدة سعادة لا توصف، وعيوني شغالة زي كاميرا السينما بتسجل كل حاجة عشان أروح أحكيها لصحابي وصاحباتي وأنا بحكيلهم عن أول يوم رحت أتفسح في البلد.....بلدي...
القاهـــــرة.

تمرد


تمـــــــــــــــرد


                                                                                                           


























 
أريـد أن أتحرر منك
من اعتيــادي عليك
من احتياجي إليــك

أتحرر
من قلقي عليك إن غبــت
ومن اشتياقي لك إن جئــت

أريدك أن تلملم أشياءك وهداياك
وصورك المبعثــرة في كل مكان.....
وترحــل

أريدك أن تأخــذ محبرتك وأقلامك
ودفاتر أشعارك
وخزانة أسرارك
وترحل










أريدك أن تمسح قبلاتً
طبعتها فوق كتفي
ودموعا....
 تركتها فوق كفي
وترحل

أريدك ....

أن تمحــو اسمك المحفور
على أعماق وجداني
أريدك أن تتركني وحدي
 وتنساني....
وترحــل                            


أريدك...
أن تأخذ عطـرك من أنفي
حتى أميــز
رائحة الكون والأشياء

أريدك أن تخرج من عقلي
من تفكيري
من مسام جلدي
من تحت أظافري البيضــاء

أريد أن أتمــرد عليك....
أتحرر منــــك.....
حتى أطالــب....
بتحرير عرائس البحر
من قيــــد المــــاء..........

سوسن سحاب                                               


أنا من القاهرة 2



أنا من القاهـــرة
2- مسافرين البلــــد
                                                                                                              


 كانت مشكلة المشاكل ومأساة المآسي كل عطلة أسبوعية وكل أجازة صيفية هي إن كل صحابي في المدرسة وجيراني في البيت يقولوا رايحين البلد... 

وطبعا بيسألوني انتي ح تروحي البلد؟ اقولهم ببراءة اﻻطفال احنا مش حنروح مكان...معندناش بلد !! 

وكان الجيران بيرجعوا من البلد محملين بخيرات الله ما شاء الله....ودايما كانت تجيلنا هدايا لذيذة جدا زي فطير مشلتت وجبنة قديمة ومورته وقرص بالعجوة. 

طبعا أمي كانت بترد الهدايا بأحسن منها وكان مبدأها في الكرم محدش يدخل بيتك ويخرج أيده فاضية... وده من المآثر اللي الناس بتفتكر بيها أمي الله يرحمها، ودايما يقولوا محدش دخل بيت الحاجة حورية وخرج أيده فاضية. 

المهم ...نرجع لموضوع البلد.
الموضوع ده عمل لي أزمة نفسية ...ولما الأزمة تفاقمت معايا رحت أبكي لماما وبابا وأنا طفلة صغيرة وقلتلهم كل الناس عندها بلد....واحنا معندناش بلد، كل صحابي بيروحوا يتفسحوا في البلد يوم الخميس والجمعة وفي الأجازة الصيفية واحنا ﻷ... 

ففهموني أن القاهرة هي بلدنا وكل جدودنا من القاهرة... وكل الناس من كل مصر بتيجي عندنا للتعليم والشغل والفسح والعلاج والسفر لبلاد بره ....يعني القاهرة بلدنا اللي عايشين فيها وحنموت فيها وكل الناس بتروح البلد بتاعتها بس ب يرجعوا القاهرة عشان يقضوا مصالحهم. 

لكن اللي بيموت بيندفن في بلده يعني زي جدودنا كلهم مدفونين في القاهرة، لكن لما حد من خارج القاهرة بيموت بره بلده بيوصي أهله يدفنوه في بلده، وقالولي لما مات أبو محمد اللي في الشقة اللي قدامنا عيلته قالت لازم يدفنوه في بلدهم في مرسى مطروح، ولما ماتت أم ميمي اللي في الدور اللي فوقنا كانت موصية تندفن جنب أمها في المنوفية ورحنا معاهم دفناها في بلدها....وكتير كده من الجيران والأصحاب اللي من خارج القاهرة.

 طبعا عقلي الصغير وقتها لم يستوعب هذا الكلام الكبير.... كل همي كان في اللعب والفسح. 

فقلت لهم بس كلهم بيروحوا يتفسحوا في البلد بتاعتهم...فقالوا احنا كمان من هنا ورايح حنتفسح في بلدنا كل أسبوع.....

وفعلا من بعد اليوم ده بقى أهلي يخرجوني أتفسح كل جمعة في البلد....في بلدنا....
 القاهرة.

سوسن سحاب 
10 مارس 2015

الاثنين، 9 مارس 2015

يارب حلها


يــــا رب حِـلَّـــهــا
                                                             
                                                      
 

عارفه


إن الوقت مش مناسب

إني أقول كلمة بحبك....

أو أقول لك كلمة 
من القلب اللي دايب


لكــن مــش بِيـَّـــــدِي
ولا قادرة أمنع نفسي إني 

كل ما أفكر في بلدي 

ألقي صورتك جوه 

كل حاجة حلــــوة

سمارك من شمسها

طيبتك من أرضها

كل حاجة فيك....
بالضبط زيها


جدعنة ابن البلد 
ويا الكرم

الشهامة

الكرامة

الكبرياء
كأني رفعت راسي....
وبصيت للهرم

في كل شيء تشبهها
حتى في وقت شدتها
لما تلقى فجأة المشاكل كلها
فوق راسك متجمعة
وتبقى لا عارف 

حبيبك من عدوك
مين ضد ومين معَ ؟؟؟

ساعتها بتفرق قوي
لما تلقى حد جنبك
حد قادر يسمعك
ويفهمك....
حد قلبه مِــلك قلبك
حد نفسه يسعدك....
حد لا يمكن يكدب عليك 

أو يخدعك
حد ولا يفكر يوم إنه يوجعك
وفي شدتك ياخدك في حضنه
يطبطب عليك ويدلعك
حد مهما الغربة تاخدك......
كلمة منه ترجَّعــــــك

حد بيشوف مصر فيك
ويشوفك في مصر
حد نفسه يكون لك
وتكون له طول العمر

حد نفسه يقول بحبك
ومش قادر.....

 وسط المشاكل كلها
غير إنه يدعي لمصـــر
ويقول يارب.......
من عندك حِلها


سوسن سحاب

الأحد، 8 مارس 2015

بالصندوق وكمان ضمان 4 سنين


بالصندوق ....وكمان ضمان أربع سنين
❇✨
حبينا يوم نشتري بوتاجاز
قلنا...نجيبه مستعمل
وننسى شوية وابور الجاز
ونبص بقى للمستقبل

شاروا علينا....
وليه المستعمل؟؟
خدوا لكم واحد بالكرتونة...
- الكرتونة؟؟؟
- أيوة الكرتونة
يعني الصندوق
وعليه كمان
تاخدوا ضمان
أربع سنين
تعيشوا فيها متهنيين
تاكلوا كباب
وتشربوا شاي من غير هباب
وابور الجاز....
- الله الله ع الإعجاز
 قال أبويا
شوفولنا حاجة بالتقسيط
أو يعني يكون تمنها بسيط
نزلنا السوق
نلف ندوَّر
شفنا كتير
ولقينا تاجــر
شكله...شاطر
وعلامة الصلاة على قورته
تقولش ختم النسر وملزوق

فضل يرغي ويقنعنا
وأغمز لأمي وأبصلها
شكله مش مريحني
نظرة عيونه بتجرحني
قالت لي عيب
 إوعي تتجنِّي
- عيب إيه؟؟
ده شكل وشه رد سجون..
يا بنتي حرام
ده الراجل كلامه موزون
وقال الله وقال الرسول

المهم قعد يقنعنا
عندي بوتاجاز
أربعة شعلة 
كهربا وغاز
لو خدتوه بيطبخ لوحده
وحتدعولي على الإنجاز
وحيوصلْكو لحد البيت
بالصندوق

بابا سأله: 
ده بالتقسيط؟؟
ضحك بسماجه:
وتمنه بسيط
وعليه ضمان أربع سنين

روحنا البيت والزغاريط
مالية الشارع
أم وفــاء جابت بوتاجاز 
بالصندوق 
وعليه ضمان أربع سنين

وفتحناه....
ويااااويلاه
باب الفرن طلع مكسور
رجعناله
بصِّلنا شذرا بكل شرور
إنتوا واخدينه بالصندوق
وعلى فكرة مش راح يرجع
- والضمان؟؟
قال لنا: يولع

رجعنا نجر ذيول الخيبة
والحزن والقهر معانا
بالضبط زي ما يكون
حد ضربنا على قفانا

وصلنا البيت معرفش إزاي
طب اعمليلنا شوية شاي

لسه بولَّع
لقيت البوتاجاز في وشي يفرقع
الحمد لله إني جريت
أبويا قال:
على جثتي لازم يرجع
وأمي قالت:
يانا يا هو في قلب البيت

رجعنا تاني للشرَّاني
بصلنا بصة 
كانت راعباني
وقفت في ضهر أبويا
وأمي كانت سانداني

قلناله صندوقك تاخده
وتسيب الحـيّ وترحل
ومانشوفش وشك هنا تاني

قال: عليَّ وعلى أعدائي
وأنا حولَّع في شارعكوا
أنا وعشيرتي وإخواني

رجعنا شارعنا نادينا الناس
نزلوا وكانوا كارهينو
وقالوا محناش خايفين منك
غشك كلنا شايفينو
تدينا الحاجة بالصندوق
والصندوق جواه ثعابينو
لمّ تعابينك وإرحل
وصندوقك محناش عايزينه
وشارعنا حينضف منكم
والســـــــــــــــــــجن....
وحشــــــــــوه مســـاجينه

سوسن سحاب
الجمعة 14/6/ 2013


السبت، 7 مارس 2015

أنا من القاهرة 1

حكايتي...الحلقة الأولى

أنا من القاهرة...
1- إنتي منين في مصر؟؟
 

.... لما حد مش مصري يسألني انتي منين في مصر؟
أرد بكل فخر..من القاهرة.

يقوم يبص لي بإنبهار ويقول: بنت العاصمة؟؟
وطبعا ساعتها أقول في نفسي اييييييه......يا أرض انهدي ما عليكي قدي...

وأحاول أمثل دور المتواضعة وكده....

ولما حد مصري بقى يسألني السؤال ده ...يدور الحوار التالي....

-إنتي منين في مصر؟؟
أنــا من القاهرة  ..

- يعني أصلك منين؟
من القاهرة.

-اﻻصل الأصل منين يعني ؟
 من القاهرة أبا عن جد.

- يعني والدك ووالدتك أصلهم منين؟؟
-قلتلك يا عم والمصحف من القاهرة.

- يعني جدودك نزحوا منين؟ 
جدودي ما نزحوش. ... جدودي استقبلوا النازحين. 


بس مفيش حد بلده القاهرة !
أنا ( باستغراب) ازاي ؟؟ !!!

-         والقاهرة دي يعني مش قديمة ولا حاجة، ده حتى جوهر الصقلي اللي سماها لما العرب دخلوا مصر
قبل جوهر الصقلي بآلاف السنين كانت تسمية القاهرة بهذا الاسم، يقول المؤرخون إن القاهرة تعني "كاهي رع" بمعنى موطن الإله رع.

وأيضا البعض يقال بأنها سميت نسبة إلى الكوكب القاهر والمعروف باسم كوكب المريخ وقيل أن جوهر الصقلي سمى المدينة في أول الأمر المنصورية تيمناً باسم مدينة المنصورية التي أنشأها خارج القيروان المنصور بالله  والد المعز لدين الله، واستمر هذا الاسم حتى جاء المعز إلى مصر فأطلق عليها القاهرة، وذلك بعد مرور أربع سنوات على تأسيسها.
ولمدينة القاهرة عدة أسماء شهيرة منها مصر المحروسة، قاهرة المعز، مدينة الألف مئذنة، جوهرة الشرق.

-
 بس برضه ﻻزم يكون لك بلد أرياف مش القاهرة وبس.
طيب أقدم جامعة في العالم جامعة أون اللي هي منطقة عيش شمس في القاهرة كانت فاتحة ليه في القاهرة لو القاهرة فاضية وملهاش أهل....فاتحة في القاهرة بس عشان تستقبل الناس من الأقاليم؟؟

-
أنا أول مرة أسمع عن الجامعة دي ومدينة أون أصلا..
كونك ما سمعتش عنها ده تقصير منك، بس القاهرة كانت عاصمة لمصر من آلاف السنين...ازاي تكون عاصمة ومفيش ليها سكان؟
 كانت  أول عاصمة لمصر الموحدة قبل عصر الأسرات والملك مينا وأطلق عليها مدينة "أون" في عهد ما قبل الأسرات وعرفت فيما بعد بالاسم الإغريقي هليوبوليس أو عين شمس حالياً.
وبعد الفتح الإسلامي لمصر سنة 18 هـ/639 م،عمرو بن العاص بنى مدينة الفسطاط  سنة 21 هـ/641 م، وبنى جامع  سمَّاه باسمه (جامع عمرو).
ولما عمرو بن العاص دخل مصر؟؟ كانت فاضية ؟؟  ﻻ طبعا....المؤرخون قالوا استقبله أهالي المحروسة ....أهو إحنا بقى أهل المحروسة.

يعني القاهرة من قديم اﻷزل ولحد آخر الزمان حتفضل العاصمة اللي أهلها بيستقبلوا أهلهم وحبايبهم من كل مكان جوه مصر وبره مصر.



- طيب


   

الخميس، 5 مارس 2015

تقاسيم حزينة


تقــاسيــــم حـزيــــــــــنة....
                                                                                           


 




















مش أي حد حبيناه
حيبقى لينا
ولا أي حلم بنحلمه
تطوله ايدينا
اللي كتبه ربنا
بس حتشوفه عنينا...
***********
لو حابب تعاني
عيش لك ثواني
في الأماني
المستحيلة...
***********
أو فكر ساعات
في هَـمّ وحاجات
مش حتجني منها
غير الآهات
************
ليه تمشي في طريق
وإنت عارف آخرته
ده مش حبيبك
وسكتك مش سكته
***********
مستحيل تلقى الفرح
وسط النــواح
حتنجرح حتنجرح
وترجع تشكي من الجراح


***************
أوقات نقابل ناس في سكتنا
تحس كأنها ليـــنا مرسومة
نشبه بعضنا, حتى في بسمتنا
كأننا فولة ونـُصين مقسومة
لكن للأسف مش قسمتنا


*************
في حاجات كتير زي الحلم
تعيش فيها مبسوط ومصدق
وتفتكر إنـــه باقي
ع الحلم خطــوة ويتحقق
تمد ايدك تمســـكـه
يهرب ما تلحــــق
تفتح عنيك وتبص
تلاقي الفجر بيشقشق


***********
تبدأ تدور حلم جديد
حب جديد
تعيش معاه

جرح جديد
ووهـــم جديد
تحلم بيه وتستناه


*****
لحظات فرح بنسرقها من....
تقاســـيم حزينة في الحياه 


************
سوسن سحاب

الأربعاء، 4 مارس 2015

أبجدية جديدة


أبـجـــــــديـة جـــــديـــدة
                                                                                 


أريد اختـــراع أبجــدية جــديـدة
وحــروف جـــديـدة
وكلمـــات جـــديدة
ليســـت ككل حـــروف الهـــجاء
أحبـــك فيــها بـلا عنـــاء
وتفهمنــي فيها بلا شقـــاء

أريـــد اكتشــاف أبجـــدية 
لا يفهمهــا أحــــدا ســوانا
شــــفرة ....
لا تلتـــقطها سوى عينــانا

كــلام...ليس ككل الكـــلام
كهمهمـــات أطفــال
مــا قبـــل الحضــانة

لغـــة خاصـــة جدا
 لا يفهمها...
إلا أهــل مــدينــتي
يا أحـلى وأجمـــل الســكانا
ويا ســاكنــي الـوحـــــيد
لا قبـــــــــلك سكنـها 
ولا بعــدك إنســـانا

يـا آمـــري
وآســـــري
وأميـــــري
ومــــلك الزمــــانا

أحبــــك أحبــك 
بكل اللغـــــــات
وغيــر اللغــــات
التي لايفهمهـــا ســــوانـا


سوسن سحاب

الأم في القرآن والسنة




الأم في القرآن الكريم 

بقلم: سوسن سحاب                                                             

                                                                                      



أصل الطيب
كلمة "الأم" أطلقها القرآن الكريم على الأصل الطيب والمقدس لكلّ شيء عظيم.
فمكّة المكرّمة هي "أم" القرى، لأنها مهبط الرسالات السماوية التي اختزلها الله عزّ وجلّ في "الإسلام" الذي كان غاية الرسل والرسالات جميعاً، فقال تعالى: "مصدق الذي بين يديه ولتنذر أم القرى ومن حولها" الأنعام:92، وقال:"وكذلك أوحينا إليك قرآناً عربياً لتنذر أم القرى ومَن حولها" الشورى:7.

كما أطلق الله عزّ وجل على كتابه العزيز مصطلح "أم الكتاب"، فقال تعالى: "يمحو الله ما يشاء ويثبت وعنده أم الكتاب" الرعد:39.


الفرق بين الأم والوالدة
الــوالــدة
وفرّق القرآن الكريم بين الأم والوالدة....فأطلق لفظ "الوالدة" على المرأة التي تنجب الطفل بغض النظر عن مواصفاتها وصفاتها سواء كانت حسنة أم قبيحة. فالموضوع فقط مجرد عملية إنجاب حيث يلتقي الذكر بالأنثى وما يتبع ذلك من حمل وإرضاع، كما قال تعالى:"والوالدات يرضعن أولادهنّ حولين كاملين لمن أراد أن يتمّ الرضاعة"البقرة:233]

وأوجب الله تعالى البر والإكرام للوالدة حتى لو كانت كافرة أو غير صالحة....وقال تعالى: "وقضى ربّك ألا تعبدوا إلا إياه وبالوالدين إحساناً" الإسراء:23...

الأم
أما الأم فقد أطلقها الله عزّ وجل على رمز التضحية والفداء والطهر والحب والحنان وكل أصل كريم، وهي مدعاة للفخر والشرف من أبناءها....

الفروق في القرآن
لتقريب الأمثلة من أذهاننا.....نتأمل ما ذكره القرآن على لسان سيدنا عيسى عليه السلام، فعندما تكلّم عن وجوب البرّ والإكرام ذكر وصف "الوالدة"، فقال:"وبراً بوالدتي ولم يجعلني جباراً شقياً" مريم:32.

وحين تكلم القرآن الكريم عن عيسى عليه السلام وعن المواصفات والصفات الكريمة والمعجزة للسيدة مريم، أطلق عليها لفظ "الأم"، فقال عزّ وجل:"ما المسيح ابن مريم إلا رسول قد خلت من قبله الرسل وأمّه صديقة" المائدة:75.
وعندما أراد الله عز وجل تكريم الأم...لفت نظر الأبناء إلى معاناة الأم من الحمل والولادة، فأطلق كلمة "الأم" رمز التضحية والصبر المكرمة وأمرنا الله بإكرامها في الدنيا إكراماً لا حدود له.


بر الوالدين
ومن بلاغة القرآن الكريم في هذا المجال أنه عندما يوصينا ببرّ الوالدين فإنه يعقبها بالحديث عن الأم فقط لعظم فضلها على الأب "ووصّينا الإنسان بوالديه حملته أمه وهناً على وهن"لقمان:14

التضحية أم
وعندما ذكر القرآن الكريم شدة المعاناة في الحمل والولادة والتضحيات العظيمة...أطلق عليها لفظ ( الأم ) كما في قوله تعالى: "ووصّينا الإنسان بوالديه إحساناً حملته أمه كرهاً ووضعته كرهاً".

الحنان والشفقة أم
 وعندما ذكر الله عزّ وجل الحنان والعطف على الأبناء، ومدى الشفقة والرحمة والخوف على أولادها عبـَّر الله عنها بلفظ الأم فقال: "وأصبح فؤاد أم موسى فارغاً إن كادت لتبدي به لولا أن ربطنا على قلبها لتكون من الموقنين"القصص:10].

فرحة الأم بعودة وليدها
وعن مدى سعادة الوالدة وفرحها بعودة ولدها الغائب من خطر محدق وشر لا مفر منه.....أطلق عليها القرآن الكريم كلمة "الأم" فقال عز وجل: "فرجعناك إلى أمك كي تقرّ عينها ولا تحزن" طه:40.


الأم قدسية
 وأطلق القرآن الكريم لفظ الأم دلالة على القدسية والاحترام والحب الشديد لنساء النبي صلى الله عليه وسلم فذكرهم بكلمة "الأمهات" وليس الوالدات فقال: "النبي أولى بالمؤمنين من أنفسهم وأزواجه أمهاتهم" الأحزاب:6.....بالرغم من أن بعضهن لم تنجب منهم فعليا، ولكن تسميتهم بالأمهات تكريم لهن.


الأم في السنة النبوية
كثرت الأحاديث النبوية في هذا الموضوع....ولذا سأكتفي ببعض الأمثلة التي ستوفي بالغرض إن شاء الله.


أكبر الكبائر بعد الشرك
سُئل النبي صلى الله عليه وسلم عن الكبائر،فقال: "الإشراك بالله وعقوق الوالدين وقتل النفس، وشهادة الزور". رواه البخاري
ونهى الرسول صلى الله عليه وسلم عن سَبّ الوالدين وبيّن أنه من الكبائر فقال: "إن من أكبر الكبائر أن يلعن الرجل والديه" قيل يا رسول الله! كيف يلعن الرجل والديه؟ قال: "يسُب الرجل أبا الرجل فيسبّ أباه ويسبّ أمه" . رواه البخاري

أمك ثم أمك ثم أمك
سُئل رسول الله صلى الله عليه وسلم: مَن أحقُّ الناس بحسن صحابتي؟ قال: "أمك". قيل: ثم من؟ قال: "أمك". قيل ثم من؟ قال:"أمك". قيل ثم من؟  قال: أبوك. .   رواه البخاري .


قضاء دين الأم
ومن تمام الإحسان للأم أيضاً قضاءُ ما كان عليهما من دَين لله أو للناس فقد سأل أحد الصحابة رسول الله صلى الله عليه وسلم عن نذر كان على أمه، وتُوفيت قبل أن تقضيه فقال رسول الله صلى الله عليه وسلم: "فاقضِه عنها" رواه مسلم.

وجاءت امرأة تسأله صلى الله عليه وسلم عن أمه التي ماتت وعليها صوم شهر؟ فقال: أرأيتِ لو كان على أمك دَين أكُنتِ قاضيَتَه؟ قالت: نعم. قال رسول الله صلى الله عليه وسلم: "فدين الله أحق بالقضاء".

وكذلك امرأة سألت عن أمها وماتت ولم تحجّ؟ فقال رسول الله صلى الله عليه وسلم: "حُجيّ عنها". رواه مسلم



                                                                                            سوسن سحاب